Државен советник

Гордана Гапиќ Димитровска

Државен советник 

Гордана Гапиќ Димитровска е државен советник во Министерството за јавна администрација со повеќе од 20 години професионално искуство во реформа на јавната администрација, регулаторна реформа, транспарентност, отчетност и отворена власт.

Дипломирала на Правниот факултет при Универзитетот „Св. Кирил и Методиј“ во Скопје во 2002 година, а правосудниот испит го положила во 2008 година. Кариерата ја гради во јавниот сектор, со фокус на политики за добро управување, дигитализација на услуги и соработка со граѓанскиот сектор. Од 2003 година работи во Генералниот секретаријат на Владата на Република Северна Македонија каде била одговорна за следење и координација на процесите за реформа на јавната администрација, воведување на е-услуги, Граѓански дневник, координација на донаторски проекти, следење на европското законодавство и изработка на примарна и секундарна регулатива.

Од 2011 година е дел од Министерството за информатичко општество и администрација, каде што раководи со клучни процеси како регулаторна реформа, проценка на влијанието на регулативата (ПВР), регулаторна гилотина, ЕНЕР, е-демократија и отворени податоци.

Како Национален координатор за Партнерството за отворена власт од 2015 година, ги предводи процесите за ко-креирање и ко-имплементација на акциските планови, во партнерство со институциите, граѓанскиот сектор и меѓународните партнери. Во моментов е и ко-претседател на Советот за координација на Партнерството за отворена власт.

Во периодот 2018–2025 година била заменик-претседател на Советот за соработка меѓу Владата и граѓанското општество. Била и член на Европскиот комитет за демократија и управување (CDDG) при Советот на Европа, каде што претседавала со Работната група за е-демократија, како и претставник во ЕУ поткомитети, ReSPA и други регионални и европски иницијативи.

Гапиќ Димитровска активно соработува со бројни меѓународни партнери, меѓу кои Советот на Европа, ЕУ, SIGMA, OGP, УСАИД, УНДП и амбасадите на САД и Обединетото Кралство. Таа е специјализирана за креирање на политики, проценка на влијанието на регулативата, спроведување на јавни консултации, намалување на административните бариери, модернизација на јавната администрација и унапредување на демократското управување, вклучително и е-демократија и е-управување.