Sot, në hapësirat e ish-Ministrisë për Shoqëri Informatike dhe Administratë, u zhvillua ceremonia e dorëzim-pranimit të funksioneve të ministrit për Transformim Digjital dhe ministrit për Administratë Publike.
Stefan Andonovski, ministër për Transformim Digjital dhe Goran Minçev, ministër për Administratë Publike, u pritën nga ministri në largim i Ministrisë për Shoqëri Informatike dhe Administratë, Naim Bajrami, zëvendësministri Aleksandar Bajdevski dhe sekretari shtetëror Elvin Hasan.
Ministri Bajrami i mirëpriti ministrat e rinj në një atmosferë solemne dhe u uroi shumë fat dhe sukses në sfidat e reja.
Siç dihet, me Ligjin e ri për ndryshimin dhe plotësimin e ligjit për organizimin dhe punën e organeve të administratës shtetërore, i cili u miratua më 8 qershor 2024 në Kuvendin e Republikës së Maqedonisë së Veriut, Ministria për Shoqëri Informatike dhe Administratë pushoi së funksionuari, dhe nga ajo u formuan dy ministri të reja: Ministria për Transformim Digjital dhe Ministria për Administratë Publike.
Naim Bajrami ishte zgjedhur ministër i Ministrisë për Shoqëri Informatike dhe Administratë më 12 shkurt 2024.
