Ministri i Administratës Publike, Goran Minchev, gjatë paraqitjes së tij sonte në Dnevnik të Alsat TV, theksoi angazhimin e Qeverisë për stabilizimin e buxhetit dhe përmirësimin e pagave në sektorë të ndryshëm, duke përfshirë administratën publike.
Në gjashtë muajt e kaluar, Qeveria ka adresuar me sukses gjendjen katastrofike të buxhetit, duke parashikuar një rritje prej 8% në mesatare për punonjësit në administratën publike në kuadër të zgjidhjeve të reja ligjore.
“Kjo rritje e pagave prej 8% në administratën publike është pjesë e zgjidhjeve të reja ligjore të propozuara nga Ministria e Administratës Publike, duke siguruar që pagat të përshtaten me pagën mesatare aktuale, e jo me pagën minimale, e cila ishte një nga kërkesat kryesore të sindikatave,” tha Minchev.
Rritjet e pagave tashmë janë realizuar në disa sektorë kyç, siç janë Ministria e Arsimit dhe Ministria e Shëndetësisë, si dhe janë rritur pensionet për pensionistët, të cilët morën shtesë financiare prej 2.500 denarësh në tranqen e parë, ndërsa një tjetër 2.500 denarë do të marrin në mars të këtij viti.
"Për disa kategori të punonjësve në administratën publike, rritja do të arrijë deri në 13%, varësisht nga pozita e punës, që është një tregues i qartë i përpjekjeve të Qeverisë për të siguruar zgjidhje të drejta dhe të qëndrueshme," shtoi Minchev.
Në lidhje me një krizë të mundshme në administratën publike nëse nuk plotësohen kërkesat e sindikatave, Minchev theksoi se ai nuk sheh asnjë bazë për një skenar të tillë, pasi Qeveria ka bërë hapa të rëndësishëm për përmirësimin e kushteve në sektorin publik brenda vetëm gjashtë muajsh.
"Gjatë gjashtë muajve të parë të këtij mandati, kjo Qeveri ka arritur rezultate konkrete, ndërkohë që Qeveria e mëparshme, gjatë shtatë viteve, nuk bëri pothuajse asgjë për përmirësimin e situatës. Nuk do të doja të mendoj se këto protesta kanë një pasqyrë politike," tha Minchev.
Minchev njoftoi se nesër do të zhvillojë një takim me presidentët e Bashkimit të Sindikatave të Maqedonisë dhe UPOZ për të shqyrtuar kërkesat e tyre dhe për të përmirësuar kushtet e punës në sektorin publik.
Ai gjithashtu u shpreh për efikasitetin e administratës publike, duke theksuar se kapaciteti aktual i punës është rreth 30-40%. Për të arritur një efikasitet më të madh, është e nevojshme që të bëhet edukim dhe ri-arsimim i punonjësve për të zgjidhur problemet me mbipopullimin ose nën-përfaqësimin e stafit në disa sektorë.
"Qëllimi ynë është të krijojmë një administratë publike efikase që do të shërbejë për qytetarët," përfundoi Minchev.
