Në kuadër të forcimit të bashkëpunimit rajonal, Ministri i Administratës Publike të Republikës së Maqedonisë, Goran Minchev, realizoi një takim bilateral me Ministren e Administratës Publike dhe Vetëqeverisjes Lokale të Republikës së Serbisë, Jelena Zharikj Kovachevikj, ku u diskutuan fushat e bashkëpunimit të orientuara drejt përmirësimit të sistemeve të administratës publike në të dy vendet.
Në takim u theksuan marrëdhëniet e shkëlqyera mes dy shteteve, ku të dy ministrat shprehën përkushtimin e përbashkët për thellimin e bashkëpunimit në fushën e qeverisjes dhe reformave administrative.
Në këtë drejtim, përpjekjet e të dyja palëve kulmuan me një marrëveshje për nënshkrimin e një Memorandumi Bashkëpunimi në periudhën në vijim, i cili do të formalizojë shkëmbimin e praktikave më të mira, nismat e përbashkëta dhe ekspertizën e ndarë në administratën publike.
“Nënshkrimi i këtij memorandumi bashkëpunimi do të shënojë një kapitull të ri në partneritetin ndërmjet Republikës së Maqedonisë dhe Republikës së Serbisë në fushën e administratës publike, duke theksuar njëkohësisht qëllimin tonë të përbashkët – modernizimin e administratës publike dhe forcimin e proceseve dhe kapaciteteve që burojnë prej saj,” theksoi ministri Minchev.
Ministrja Zharikj Kovachevikj e konfirmoi këtë nismë, duke theksuar rëndësinë e partneriteteve rajonale për nxitjen e reformave që do të përmirësojnë ofrimin e shërbimeve publike për qytetarët në të dy vendet.
Të dy ministritë do të angazhohen që, përmes konsultimeve dhe takimeve të rregullta, të punojnë në procese konkrete që do të kontribuojnë në zbatimin efektiv të reformave në administratën publike, të cilat do të jenë pjesë e Memorandumit të Bashkëpunimit.
