Me iniciativë të Kryeministrit të Republikës së Maqedonisë së Veriut, Hristijan Mickoski, dhe në organizim të Institutit Republikan Ndërkombëtar (IRI), Ministri i Administratës Publike, Goran Minçev, mori pjesë sot në takimin e parë të një serie takimesh me temën "Sundimi i ligjit, qeverisja e mirë dhe lufta kundër korrupsionit", në kuadër të dialogut ndërmjet Qeverisë dhe sektorit civil.
Ministri Minçev theksoi se qëllimi kryesor i Qeverisë është rikthimi i besimit të qytetarëve në institucione, zvogëlimi dhe eliminimi i korrupsionit dhe forcimi i sundimit të ligjit.
“Si Ministri e Administratës Publike kemi ndërmarrë hapa për tërheqjen e tre projektligjeve thelbësore të paraqitura nga qeveria e mëparshme,” tha Ministri Minçev.
“Këto ligje — Projektligji për nëpunësit administrativë, Projektligji për të punësuarit në sektorin publik dhe Projektligji për zhvillimin profesional dhe trajnimin e nëpunësve administrativë — janë ligje sistemike themelore që shënojnë fillimin e reformës së administratës publike,” shtoi ai.
Ministria është e përkushtuar për miratimin e këtyre ligjeve përmes një procesi të përmirësuar dhe gjithëpërfshirës që siguron përfshirjen aktive të të gjithë palëve të interesuara, përfshirë organizatat e shoqërisë civile, institucionet, sindikatat, organizatat ndërkombëtare, përfaqësuesit e SIGMA-s dhe Komisionit Evropian, ekspertët dhe opozitën.
Pjesëmarrja e ministrit Minçev në këtë takim me OJQ-të dhe shoqatat qytetare nënvizon më tej përkushtimin e Ministrisë për transparencë, bashkëpunim dhe reforma të fokusuara në ndërtimin e një administrate publike profesionale dhe me integritet të lartë.
Përpjekjet për gjithëpërfshirje të Ministrisë u dëshmuan edhe përmes diskutimeve publike të zhvilluara në bashkëpunim me Qendrën për Menaxhimin e Ndryshimeve (QMN), si pjesë e fushatës "Të gjithë së bashku për administratë publike profesionale dhe cilësore."
Ministri Minçev vlerësoi suksesin e këtyre diskutimeve, ku shoqëria civile dhe publiku i gjerë patën mundësinë të shprehin mendimin e tyre për ligjet e propozuara. Gjithashtu, janë mbajtur dy diskutime publike në bashkëpunim me Asociacionin e Njësive të Vetëqeverisjes Lokale të Republikës së Maqedonisë së Veriut (ZELS), ku administratat komunale nga mbarë vendi ofruan komente të vlefshme.
